سلام من راعي المعنى لراع الجواب=رديت(ن) توجد الجزلات بركونها
عندي سؤال عساك تجيب حله صواب=وش بنت(ن) هل الرمعه مايلقونها
تمسي وتصبح مع الهجن الاصيل الركاب=اصيلت(ن) بينت للناس مضمونها
لها خوي(ن) مهو شايب ولا هو شباب=مثل ماقالوا ترى فن(ن) من فنونها
ولك التحية يابن مظهور عد السحاب=وعداد فرض الصلاة اللي يصلونها
وان كان حليتها .. فسر معان الخطاب=هي وشي البنت قلي وش يسمونها
وان كان ماصبتها اعلن قرار انسحاب= لكن اخبرك .. ترى الوقفات ماتخونها

يامرحبا بالعزيز الي بعث لي كتاب = برسالة(ن) كل خلق الله يشوفونها
اذعن لها الفكر كله .. والهجوس استجاب = وسار القلم يكتب الجزلات لعيونها
فيها سؤال(ن) موجه من عزيز الجناب = عن .. بنت معها خوي .. تحميه ويصونها
سألتني .. ياحمــــــــد .. وابشر سؤالك مجاب = واجابتي .. مايطيح الصح من دونها
هذي هي .. ( الكفه ) .. الي يوم قل الزهاب = والناس من فعل اهاليها يهابونها
وسم(ن) نزيه .. وعلامة يُمنع الإقتراب = خطر على الي يحاول كسر قانونها
وتبقى .. وتفنى .. وهي كفة نسب .. وانتساب = تبقى ولو حاول العدوان يمحونها
لأنها شامخه مثل شموخ الهضاب = ومن دونها رجال طول الوقت يحمونها
هذا هو الحل .. واستأذنك حان الذهاب = ابتركه في رساله عند مأمونها
كتبتها شعر .. واعلنت اكتمال النصاب = واطلب من الربع لاجوها يزكونها !!!