ياطيب ليلن جاب لي صياف من بـد الحـروب=
اللـي وزنهـا فـي يديـه ولاشـرا ميزانـهـا
الك البقا والطيب يوجـد فالشمـال وفالجنـوب=
والطيب من فعل الرجال اللـي طـوال ايمانهـا
حنا سرينا الليـل كلـه كـان ماهبـت هبـوب=
وان كان هبت قوم سـج الخيـل فـي ميدانهـا
الناس تجهل في بعضها ماملكت سـر الغيـوب=
لكن طلوع الشمس من فـوق العـرب برهانهـا
ترا الوعد لك يالسحيمي فالوسيع مـن الـدروب=
لا لاح بـراق المـزون اللـي عـزل ربانهـا
ياكثر ناسن مايعرفون الطلـوع مـن الغـروب=
مثـل السفينـه فالبحـر يـوم انقلـب ربانـهـا
ترا الدروب البيض بين النـاس مافيهـا عيـوب=
واهـل العوايـد لاتغمـض والكحـل فاعيانهـا
مادام عينك صاحيه منته عـن النـور محجـوب=
اقرب من الصوره وتعـرف شكلهـا والوانهـا
انته تصعبهـا وهـي ياعـود مافيهـا صعـوب=
كـل الطيـور مسطـره بالمسطـره جنحانهـا
خيل العرب ماعـاد فيهـا لانـزول ولاركـوب=
عشرين منهـا فـاول الهجمـه تجـر ارسانهـا
الله يعينك قوم سـو السالفـه باحسـن سلـوب=
واليا هـداك الله تحـط النـون مثـل اخوانهـا
خيل العرب راحت بعد جوها كبيريـن القلـوب=
اللـي تـدور دربهـا واللـي تجـر اعنانـهـا
اللي مضى فالباخـره مافيـه للراكـب ركـوب=
واليـوم لريـاح الهبـايـب فتّـحـت بيبانـهـا
مايبلش العربان غيـر الشيـخ نفـاخ الـذروب=
اللـي ليـا قـرب مـن الحيـه تمـد السانهـا
الظاهر انك تطلع من الحفـل مغفـور الذنـوب=
هذا هدف مـن يرمـي الحبـه علـى طحانهـا
حنا ترانـا مانبيهـا يبيـض الشـارب سحـوب=
الخزنه اللـي دونهـا سلطـان مـن سلطانهـا
حنا ذخرنا السيـف ياصيـاف لاشبـت شبـوب=
وام الكبايـر مالهـا الا لسـان مثـل السانـهـا
حنا نبيها في ردون الثـوب ماتصـل الجنـوب=
ياشين رمـي البنـدق اللـي منعفـت نيشانهـا
انا تراني يابيـض الشـارب مافتـش بالجيـوب=
اخـذ ماشـاح ولاح والدنيـا ياكثـر الحانـهـا
تبا تبين الشمس فـوق الثلـج ليـن انـه يـذوب=
تـارد عليـه النـاس وتعبـي منـه صملانهـا
انا ادري انك يالسحيمـي لامهبـول ولاكـذوب=
احرفتها براس العصا واضفت عليـك اغصانهـا
تبا تبين الشمس مير الثلـج الابيـض دوب دوب=
تـارد عليـه ام العيـال وقرقـعـة قدحانـهـا
حنا حسبنا المكسب المعروف والاصل محسوب=
لوكان بعض النـاس تـدري كـان زاد جنانهـا
انـت متجهـز للقشـر والا متجـهـز للهروب=
نـارن لهـا دخـان بيـن ايديـك وش دخانهـا
ماراح شي من الجمـال الا البعريـن النصـوب=
اللي تطـب اوطـان يابوزيـد غيـر اوطانهـا
ماعندنا وحده مـن الثنتيـن يالشيـخ النصـوب=
اليـا دهنّـا الـروس والله مايـروح دهانـهـا
ابليس حـوّل فـي جهنـم ميـر عيـا لايتـوب=
ذلولـه القشـرا لـك الله مايـمـس بطانـهـا
ان كان صرت بنص درب الناس يالقاضي نشوب=
نصبر على اجحـا ليـن ياخـذ حاجتـه ديانهـا
الهرج واجد والعرب مابيـن غالـب ومغلـوب=
مير المدينـه ياسحيمـي كـم عـدد سحمانهـا.
ياكثر قدحان العرب فالبيـت والديـس محلـوب=
الجـوع ذبّحهـم وخبـز الهنـد فـي عمدانهـا
اهل الحجاز من الكرم مايذبحون الا العصـوب=
واللي قعد ياكـل ثـلاث ايـام مـن عصبانهـا
حاصل على ترخيص من وزارة الثقافه والاعلام السعودي
ثنيان الرشيدي وصياف الحربي
العرض المتطور
