قصة حقيقيه صاحبها منوم في مستشفى المجمعه

السلام عليكم ورحمة الله



قصة حقيقيه صاحبها منوم في مستشفى المجمعه



دخلنا عليه وكان كل جسمه ورجليه مجبسه
وماتسمع إلا آه واوه وأي ومادري وش فيه بعد ماغير يونون من الأوجاع اللي فيه عاد اناقلت يمكن انه مسوي حادث قوي أو أنه محترق أو أو أو...ألخ،

المهم جاءت الساعة 4 العصر وبدا وقت الزيارة

أنا استغربت من شي غريييب كل من جاء يزور هذا الشخص يطلع من عنده ميت من الضحك.

انا جاني الفضول وقلت وش السالفه وعلى هالحال كل من جاء وسلم عليه ماتسمع الا ضحكهم من ورا الستاير.

انا قلت لازم اعرف وش السالفه

انتهى وقب الزيارة وانقز له على طول واتشافا له الحمدلله على السلامه
عسى ماشر ومن هالكلام وانا همي اعرف ليش يضحكون:

المهم قلت له:انا اشوف اللي يجونك يروحون من عندك إلا وضحكهم واصل آخر المستشفى،،،
قال لي:هههههههه ليش عاد أنت حاسدنا على الضحكه...
قلت له:لايا أخوي ماهي كذا السالفه والله لو عندك مليون كان يمكن احسدك!
...بس اضحكوا عادي خذوا راحتكم بس بغيت اعرف السر يعني..إذا ماعندك مانع..
قال لي : طيب ولايهمك أنت مثل ماتشوفني مكسر ومربط بالشاش...
قلت له:إيه والله ...الله يشفيك

قال لي:ياطويل العمر انا ساكن في شقه في الدور الثاني،،،وعندي بلكونه مافيه زيها مررره حلوه.. وإذا نمت فتحت باب البلكونه،،،،وطفيت النور،،،وتسدحت على السرير ويوم نمت على السرير..وغصت في اعماق اعماق نومي....
حلمت اني في يوم القيامه،،،
وحلمت مثل ماتقول ان الناس في مكان مثل موقف الباصات وفيه باصات رايحه للجنه وباصات رايحه للنار!!!...
المهم الجماعه ينادون بالأسامي ..فلان بن فلان باص النار...فلان بن فلان باص الجنه،،وهكذا..فلان بن فلان...هذا اسمي.....وقلبي يدق ويدق...رووح باص الجنه،،،
اوووووووه الحمدلله ارتحت ومشيت ادور على الباص اللي مكتوب عليه الى الجنه..وحصلته ودخلت فيه...
مشينا بالباص وبعد فتره جتنا لوحه مكتوب عليها )الجنه 50كيلو()النار 100كيلو(وهذا حنا مع اللوحات....والله وتتعدى الجنه ... قلت يمكن السواق يعرف مكان لباب ثاني..شوي وشفت النار 15كيلو وبعد شوي النار 10كيلو وكل شوي نقرب من النار...يارجال وش السالفه ..المشكله الناس ساكتين وماحد قلق في الباص إلا انا،،،،،
قلب بدخل على السواق وشفته معطيني ظهره...إيه إإإيه انت وين رايح؟؟؟!!...
قال لي بدون مايلتفت :رايح للنار ياحبيبي..قلت له:ويش انا من أهل الجنه..وليش توديني النار ياوجه النحس،،!!
والتفت لي،،وطلع ابليس! ! !..الله يلعنك ..انا من أهل الجنه...ياملعون لاتوديني النار...انا من أهل الجنه..والله العظيم إني من أهل الجنه...تو من شوي قايلين اسمي.وقف ..وقف ..وهذا انا اصارخ ...وهو بأنواع الضحكات الشريره هاهاهاهاها....هاهاهاهاها....هاهاهاهاها...قلت ياملعون وقف !!ابي انزل!!.
قال:والله الباص هذا مبرمج على انه مايوقف إلا في النار...تبي تنزل طب منه...وركضت على الباب وفتحته،،وهووووووووووب ولا وعيت إلا في المستشفى...قافز من البلكونه...في الحوش!!!

(القصه صحيحه...وحصلت لواحد كان منوم في مستشفى المجمعه العام)

(منقــــــــــــــــــــول)