لاصار قلبي لك وطن ابسالك وين الولاء..؟!!

لاصار قلبي لك .وطن. ابسألك وين الولاء..؟


وشلون حال المملكة.؟ .. دام الخيانة من {ملك}


قبل ابتدي عندي طلب ركز طلب ماهووو رجاء..


مابي تجاوبني .. ولاتستغرب اني اسألك


لاتنصدم من عزلتي حالي مثل كل الولاء..

عندي سبب ماتستحق اني اجيك واوصلك.؟

لاتعتبر جمر الحكي من شاعرك يعني هجاء ..,
لوكنت بهجي حظرتك ماخفت منك قلت لك ..!



هذي القصيدة مصنفة في دفتري قصة رثاء
حب يموت وينولد .. وحب يعيش ويقتلك

ناديت لك ياما .. ولا لبيت لي وضاع النداء!


مبحوح صوتي والصدى من كثر ماناديت لك !
اقرب من اثيابي علي وابعد من نجوم السماء..


ورغم ابتعادك والتعب ارسم على طموح وامهلك..

ماكنت لي الداء وماكنت لجروحك دواء ..
ماعشت في دنياي لي !!
عايش ولكن عشت لك !!


علمتك القلب الوفي .. مابخذلك فية انتماء !
وعلمتني كيف العشم في من تحبة يخذلك !!
علمتك ان اصل الهوى يرجع ل كلمة احتواء !
وعلمتني ان الهواى . ماعاش يوم بداخلك !!
علمتك اني لك بحر{مده وجزرة} لك وفاء !
وعلمتني كيف انصدم واغرق انا في ساحلك !!



ماتستحي ,, دامك كذا .؟
افعل حبيبي ماتشاء !
توي عرفت اني كثر ما أعرفك ..
كنت اجهلك !


ماكان قلبي بس لك وقلبك لعب دور الدهاء !
وماكنت لك اقرب من انفاسك واقرب من اهلك ؟!


ماعاد تفرق غيبتك او رجعتك..
عندي سواء !

كنت اهتمامي ورغبتي..
والحين دوري اهملك..

لاصار قلبي لك وطن .. ابسالك
وين الولاء..؟
وشلون حال المملكة ؟. دام الخيانة من {ملك}

ان كنت جاهل ...! لعبتك قلبي ومافيها ذكاء
حتى الطفل ان جبت لة {لعبة} ولاءه صار لك !

قبل انتهي عندي أمر ماهو طلب ولا رجاء..



لايشغلك ماضي أنتهى .. ركز على مستقبلك