عــواكيــس
•وش رائك يامعوكس توافق على عرضنا وهي أن عندنا دورة رياضية ونبي نحطك خبير تحكيم ومحلل ورئيس لجنة ونبي نقترح عليك تقديم حوافز للحكام مثلا: اللي يجيب لك كليجا يحكم أهم مباريات الدور الأول واللي يجيب لك شحنة ددسن جح يحكم أهم مباريات دور الثمانية واللي يجيب لك ذبائح يحكم "دربي الدورة" واللي يجيب لك جمبري يحكم دورة الأربعة واللي يجيب لك 10 كليو عسل من الأصلي يحكم المباراة النهائية واللي يمدحك بالإعلام تكلفه للتحكيم خارجيا.. قل تم؟
سعود المحيجن – حفر الباطن
- اقول تم والله يعين على الفشيلة!
•لم نقرأ لك يا معوكس أي تعليق عقب رد "الفيفا" حول بطولات الأندية السعودية، الظاهر البلوتوث عندك خربان؟
فالح الظامري- الدمام
- البلوتوث مليان بطولات خرطي تنشيطية!
•هل صحيح انك تغار يا معوكس من الجيل الحالي من الصحفيين وانك مثل بعض اللاعبين يهاجم اللي اتوا بعده بسبب الغيرة؟
عبد الرحمن المبردي- الجوف
- اللي يغار معروف لو تفتح التلفزيون الفجر لقيته يطل بسوالفه!
• والله خوش صفقات محلية يا معوكس اللي جابها الهلال "جبتك يا عبدالمعين تعينني لقيتك يا عبدالمعين تنعان"؟
فهد الخميس- بريدة
- إلا يا من شرى له من حلاله علل، ماهو بعلة!
• يقولون الصنيع كسب ثلاث قضايا، والله ماهو بسيط أبو سليمان، خلا بعض الناس يعيش على أعصابه وما عاد قبل على المركاز؟
نواف الدغيليبي – الطائف
- ماعاد قبل وطق اللطمة ولا عنده نية!
• ألا تتفق معي يا معوكس ان لجنة الحكام الحالية أثبتت نجاحها بدليل ترشيح عبدالرحمن القحطاني لدورة الخليج؟
ثامر المثبور – نجران
- والدليل إبعاده من باقي المباريات!
• اقترح يا معوكس ضمك للجنة الانضباط يمكن القرارات تجي سريعة وما يحتجون يفكرون ويشاورون ويحطون أنظمة جديدة؟
حبيب البرقاوي- الدوادمي
- أما ما يشاورون والشور شورك يابه!
• هالحين يامعوكس بعض الإعلاميين بربرة في القنوات وحش في بيسيرو والمصيبيح واللاعبين والظاهر حتى سواق التوبيس وما قدروا ينتقدون اتحاد الكرة ليش قرر مشاركة المنتخب بالرديف؟
فواز الغربي- الحناكية
- ما ينتقدون اتحاد الكرة من كثر أكل الجبن والطحينية!
• ماذا حل باولمبي الهلال يامعوكس، عطنا الجواب مادامك قريب من مسؤولي الأندية؟
جمل المطيري- الارطاوية
- حل به ستامب والقلابة والكبده اللي من البوفيهات اللي جنب النادي!
• عشق الملايين معوكس، ظنك مشكلة المنتخب شارة الكبتنية مثل مقال بعض المتعصبين؟
صديقك بندر العصاي – عنيزة
على طاريها انا ضحكني واحد يتميلح يقول ليش الشلهوب يوم طلع عطاها الغنام شكله يبيها يعطيها الحكم الرابع!
• صاحب المليون نكتة قلي بصراحة وش رأيك باولمبي الهلال؟
عبدالملك المرشد- عرقة
- شكل الإدارة تظنه فريق الجيران!
• عزيزي معوكس ودي اعرف وش أفضل برنامج رياضي في خليجي 20؟
صديقك عبدالرحمن الضويان – العليا
- افتح ياسمسم
* الحبيب الغالي ابو العواكيس ليه بعض الإعلاميين المحسوبين على فريق الاتحاد يهاجمون الإدارة ليل نهار؟
- يلمحون يبون بعض الناس يرجع وتجي معه المشاكل والتعصب بين الجماهير!
* ابو العواكيس تصدق أن العالمية صعبة قوية ؟
عاشق العالمي عبدالاله المنصور
- ليه ما اصدق والوحدة الإماراتي صار "عالمي" قبل تبدأ البطولة!
• صديقي معوكس ما تلاحظ أن دورات الخليج أحلى فنيا تكتيك وخطط وابداع ومهارة؟
صديقك حمد الدوسري ابو مبارك العزيزية
- وين احلى منه ووهي على وقتك يابو مبارك طقها وألحقها والكورة تسطح ألف مرة!
• الذكي معوكس إذا فاز المنتخب إن شاء الله ناوي أنحر رابع نياق لأهل الحارة!
يزيد العدان- جامعة الملك سعود
- ماعاد فيه نياق خلصت بعد الهلال وذوب آهن الإيراني!
• عزيزي معوكس وش قصة الخمسات مع العالميين الريال والنصر والاتحاد؟
عبدالعزيز التمران- الشفاء
- اسأل أندية القرن برشلونة والهلال!
• الغالي معوكس من تقترح يسدد ركلات الجزاء في المنتخب؟
مساعد العصيمي
- كلهم الا الهلاليين فالهم يصدها الحارس!
• ليش الهريفي يامعوكس زعلان على الشلهوب ومعصب حيل وش القصة؟
النصراوي ابو سعود – العريجا
- يبي الكبتنية ويبي يلعب حارس ودفاع ووسط وهجوم واحتياط!
• ليش نجوم الاهلي يامعوكس يبدعون مع الفرق الاخرى والمنتخبات بعد تنسيقهم؟
الأهلاوي مازن محمد - جدة
- يبدعون وفريقهم الاول من جرف لدحديره وطلعة القدية!
• الأستاذ معوكس متى نشوف محترفين اجانب مثل ميسي في الدوري السعودي؟
صديقك ابراهيم الكعبي- الرياض
- عز الله ما شفت مثل رازفان وروبين وحماد جي!
حاصل على ترخيص من وزارة الثقافه والاعلام السعودي
رد: اخبـار نادي القــرن لـ يوم الجمعــه 27 / 12 / 1431 هــ من الصحـف
العرض الشجري