قصيدتي مهداة الى : سعادة الاستاذ , عبد الله العويس المحترم . مديردائرة الثفافة والاعلام في الشارقة .
انا صكر - ن يعيش ابروس الجبال
________________
شعر : عباس طريم
انا صكر- ن يعيش ابروس الجبال
وما هذي الارض , الا
لصيدي
وانا الشاعر .. وكل الشعر النكال
من الماضي ومن الحاضر
كصيدي
انوخ.. ودنيتي اتحط فوكي الحمال
واكلهه شما تزيد الحمل
زيدي
لكل صاحب ..اذا بيه الحمل مال
وكلمن كال وينك ؟ ماد
ايدي
الزمن قدم لي دون الخلك موال
وكل للدنيه باليستحق
شيدي
انا الحر.. ما طعن بظهور الرجال
عتيج, ويشبه اطباع
المعيدي
ما انطي اذن للكيل والكال
ولا اكل لليعاتب انه
شبيدي
افوج بحيل صدري, يمين وشمال
واوصي ابني عله الطيبه
وحفيدي
لحب الناس من الجهل ميال
وطيب بالطبع.. مثل
الصعيدي
اذا ربعي تغير بيهم الحال
عليم الله اقدم الهم
وريدي
خلصت العمر بالدنيه رحال
ما يثبت على حال - ن
بريدي
مثل كل مغترب.. اتكطع اوصال
ومن اتلوب .. اكل للروح
هيدي
مو كل اليريده الرجل ينطال
ولا كل صاحب.. انسميه
عضيدي
ولا كلمن صعد عالمهره خيال
ولا كلمن حرس ديرة
هريدي
ولا كلمن لبس جفيه واعكال
خير صار عالوادم
يسيدي
يصح حلو الكلام.. وهو حيال
وجليل العرفه.. ينطق
بالمفيدي
مو كل الحجي الينسمع ينكال
يروحي لا بكل المضه
اتعيدي
على الله اتوكلي.. وكل تعب ينزال
ما مره نخيته وفرغت
ايدي
عباس طريم
حاصل على ترخيص من وزارة الثقافه والاعلام السعودي
قصيدتي مهداة : الى سعادة الاستاذ, عبد الله العويس المحترم .
العرض العادي
