ياعزوتي ياللي على الفطر الشيب

وقت الشدايد يقنب الذيب للذيب
................. وام الجدايل تعتزي في سندها
وأما النسور المهدفات المحاديب
................. تبطي ولا ناش الطويلة ولدها
⚔🇸🇦⚔
ما عربه حرٍ عريب المعاطيب
................. صفر العيون اللي عماها رمدها
والمجد لا يمكن بليا مطاليب
................. والـدار مـا تبـنى بـلـيـا عمـدهـا
🇸🇦⚔🇸🇦
ياعزوتي ياللي على الفطر الشيب
................. يا ذا الحرار اللي سماها مهدها
انتم ضيوف الوقت وانتم معازيب
................. وانتم بـراده وانتم ايضـاً وقدها
⚔🇸🇦⚔
"المملكة" تشكي تكالب هل الريب
................. اي والله انك يالسعودي سعدها
ردوا على الغادر نفاقه بتكذيب
................. ابي اصبعه تطرف عيونه بيدها
🇸🇦⚔🇸🇦
قولوا له اللي تبتديه المواجيب
................. وقولوا له انك "بالمـلاقا" وعـدها
تلقى السيوف المصلتات المعاطيب
................. وتلقى اسـود مع نمـور وفـهدها
⚔🇸🇦⚔
تلقى عذابك دون شكٍ ولا ريب
................. تلقى صواعق موت تلقى رعدها
دون الوطن ماهو حرام ولا عيب
................. انّـا نثـور بوجـه منـهو حسـدها
العيب والله في سواد الغثاريب
................. والعيب فـي "ناسٍ" تنـكر بلـدها
🇸🇦⚔🇸🇦
ويالله ياللي تعلم السر والغيب
................. انـك تـبـدل سـعـدها مـن نكـدهـا
وصلِّ عليه و آلهِ و الأصاحيب
................. خـتام قـاف حـلها اللـي عقـدها
⚔🇸🇦⚔