عـذب القـصيد _ قصآئد مختاره _ ابيات رائعه _متجدد

كان لكـ قلبي مدينه ولآحظ إني قلت : ((كآن))

يعني إنتَ الحين وآحد ((خآرج حـدود المدينه))


ليه مستغرب كلامي وليـه أعطيـكـ الأمـآن
وليه تَكْذِب في كلامكـ العـذر وينـكـ ووينـه


ما ألومكـ كان قلبـكـ ثـآرت أموآجـه وخـآن
الخطــأ منَّي لأني صرت فـي بحـركـ سفينـه


والسؤآل اللَّي كتمته ومآ نِطَـق فيـه اللسـآن
كيف إيدكـ إطعنتني وآنا أحْسِبْهَـا أمينـه ..؟


جرحي مآ يرضيه قلبكـ لو يجـي كلِّـه حنـآن
لو تبــوس الجرح فيني ولـو تقبلهـآ إيدينـه


يُوم أحبكـ قلت كلمه : ( يكرَم المرء أو يُهآن )
وإنتَ قلبي مآ كرمته ومآ قدرت إنِّـك تهينـه


( عزِّتـي ) .. ما هي جديدهـ آنا شامخ من زمآن
إغسل إيدكـ من رجوعي وروح يا إبن اللذينه


طآب خآطر قلبي منِّكـ وهذي الفرقـى رهـآن
وحتَّى لو قلبي يحبـكـ ربِّـي بفرآقـك يعينـه


تدري لمآ قلت أحبكـ قلت ومآ عنـدي ضمـآن
وإختيآري كآن خآطىء تجربه بالحيـل شينـه


كنت تخطي وكنت أسآمح مرَّهـ مرتين وثمـآن
أدمح الزله عشآنكـ وأكتـم أنفـآس الغبينـه


كنت أحبكـ وكنت أعزك والغلآ فينـي جبـآن
أخاف تزعل لو ألومكـ ضعت مآ بينـكـ وبينـه


في عيون النآس عآدي بس في عيني جنـآن
وكآن قلبي من يشوفكـ تفضحه نظـرة حنينـه


مآني أوَّل من يحب ومنتَ آخر شخص خـآن
المحبه في زمآنكـ بحـــرهآ من غيـر مينـه


الفشل .. كآن النتيجه وأعتقـد آن الأوآن
أبني مستقبل حيآتي وأنسى قصتنـآ الحزينـه


وخطوتي الأولى غيابكـ ورآح أطبقهآ عشـآن
يبكي قلبكـ لآ فقدني والندم .. يملـي سنينـه


جآي تسأل عن مكآنكـ !! هو بقى فيني مكآن ؟؟
الله يرحمهآ المشآعر اللي كآنت لـكـ رهينـه


قلت لكـ قلبي ( مدينـه ) فيهآ لكـ حشمه وشآن
لكن إنتَ الحين أغرب شخص في هذي المدينه

( الحزن ) حالة ما تفارق خفوقي
............... لو أبتسم صدري من الضيق .. مخنوق

يجري الحزن بِ الدم داخل ( عروقي )
................ وأقسى الحزن لاصرت ضايق من الشوق

مأذون شرعي وأربع آلاف وشهود . . . أنهت مواصيـل الغـرام وسعدهـا

البعد نار وطاعة العذل كبريت ..
.. يقصر على بعده .. ترى الكبد فاحت

تدريَ وشالليَ ( حز ) فيَ صدرَ مغليكَ !
إنيَ اشوفكَ بسَ , مقدرَ إسلمَ !

وكلَ ما إحاولَ / التفتَ لكَ , وإناديكَ !
تمنعنيَ حروفيَ / وترفضَ تكلمَ

ماعاد فيني .." أبتسم " مدام هالدمعه .. [ سلاح ]
ماعاد فيني أبتسم وأخفي ! همومي والحزن !
ومدام فكري أقتنع يرفض مبادئ..هالكفاح
بأقتل شعوري وأدفنه وأخلي أحساسي كفن
| ياليل |
تكفى ضمني .. ماعــاد فيني للجـراح .!!
| تعبت |
أجامل وأنتظر .. زود المصايب والمحن .!!
الله وأكبر × يازمن × وشلون قلبي [ ما أستراح ]
( العيب فيني ) ياترى ولا ( العيوب من الزمن )
اللي بغيته مالفى ..وأقفـا على دربه وراح .!
واللي رفضته مارحل يضحك وانا عيوني بكن .!
لاصار " حظي مركبه " تبقى المصيبه .. ! بالرياح !
تجري " الرياح العاصفه " في عكس ..ماتمشي السفن
الـهـم أصبح لي ..( وطن )
والجرح أصبح لي .. ( وشاح )
وياجرح ماعاد أحتمل مادام لأهمومي وطن
أحس بظلوعي قفص والطير مكسور الجناح
وأحس .. بعيوني .. دمع مسجون .. في داخل جفن
والليل قرب ينتهي ويزول في وقت الصباح
وانا وليلي نكتفي بس المواجــع ما اكتفن
ماعاد لأسراري بلد والحزن دمرها وباح
ولاعاد فيني أبتسم وأخفي همومي والحزن

الله يوفق مثلك الله يخليه.
........................كانك نويت الصد والهجر وياه

غالي ولك بالقلب شي ومخفيه
.......................اكبر من اللي بالضماير تهقواه

في غيبتك قلبي ترى الهم صاليه
......................واسهرت ليلي بين ونه وويلاه

البارحه طيفك مع الليل احاكيه
......................يشهد علي الليل والنجم يصغاه

فكرت ويا الليل مبدع قوافيه.
.................. ...مسحوب طرقي والقوافي تقفاه

والحزن فوق القلب والهم مقفيه
...................و ليلي غدا ليلين والصبر مقواه

اكتب شطروالشطر الاخر نجاريه
........................شاعر تحد ه والليالي توطاه

اجزل بيوت الشعر وحكم معانيه
......................ولا هزيل القاف واضح ثناياه

ياللي حرقت القلب منهو يطفيه
.....................النار نار ٍ تتعب القلب واحشاه

يا مانسيت اللي من الناس نغليه
........................ولاعاد به شي ليا حل طرياه

استر عيوب الناس والطيب ابديه.
...................وش خانت اللي ماسترعيب رفقاه

امسٍ وقبل البارح القلب اهنيه.
......................امسي مع الفرحه وصبّح بفرحاه

في شوفتك افرح مع اللحن اغنيه
.........................وطيفك يسلي كل طرقٍ بمغناه

قلبي كثير اللي من الناس ترجيه
......................وانا الذي قلبك من الناس يرجاه

لاتحسب ان الصد صعبٍ تحديه
.......................ترى الزمن يشكي ومثلي تحداه

انشد وتلقى الليل تقصر مساريه
.................صدر الزمن يشكي من اقصاه ودناه

راحت هجوسك مبعده في هقاويه
.....................انشد جبال اطويق واللي ترقاه

تلقى زمانك قاصرات ٍ لياليه
.....................هذا الصحيح وتدمع العين فرقاه

وانت الذي لاضاق صدره نراضيه
...................نتعب على شانه على شان نرضاه

ولا انت تدري من زعل عيب اصافيه
.....................يادارس اطبوع المشاعر وتدراه

يا ما لقيتك تشكي الهم تشكيه
..................وجهك عبوسٍ تشكي الحظ برداه

ياللي خذيت القلب وشعادكم فيه
....................رده ترى قلب العنا وافي اشقاه

ارفق بقلب هالليالي تفاجيه
.........................يابو ثمانٍ مرهفاتٍ مصفاه

انا عشقت وعشقي محدٍ يظاهيه
................جيتك على الفطره وذ القلب يغشاه

احساس من قمة شعورٍ وطريه
...................عليك ياللي ناسي القلب تنساه

في كفي سيفٍ للعواذيل مرهيه
................وفي صدري درعٍ لسهوم المصلاه

ياقلبي الليله على وادي التيه
...................جريت ونه والف ونه من الأه

اسمع صدى صوت المعنا بتاليه
....................اضحك واقول الله يعين الذي تاه

والحق انا اللي تايهٍ في دواهيه
.......................مجراك نار تكوي القلب تكواه

باغيه قلبي والمشاعر تناديه
........................قلبي عشق قلبه مع الليل ناداه

يفداك منهو يجمع اريال وجنيه
.........................يفداه وجه الطيب والعز يفداه

مثل البواخر لا رست في مراسيه
...................حبك رسا صبح ومسا ابكل مرساه

بين الظلوع الحدب حبه ابنيه
....................واكتب عليه من الغلا شي يزهاه

لكنّ كيف القلب هذا امتناسيه
...................ياصرح مدري جرح ياجرح ودواه

يمكن صواديف الليالي تحاديه.
...........................ولاّ تغلا والغلا في مزاياه

لكنّ قلبي ماصبر ليل مشقيه.
.......................دنت هجوسي والبلا في محاتاه

همٍ على قلبي وهمٍ يباريه
...................... .ولا جروح القلب صعبه تبراه

البارحه قلبي من اللي يداويه
.......................ياكود وجهٍ يبري الجرح ملفاه

حامت شياطين الشعرمن بلاويه
...................وسرحت في عالم صعيبٍ بمسراه

هلّت دموع العين هلّت غواديه.
.....................على الذي قلبي من الناس بداه

اكتب حسين القاف وارجع ومحيه
.......................جف القلم حبره ولا نافعٍ ماه

شطرٍ نهليبه وشطرٍ نحييه
..................وشطرٍ على ماقيل ملعون مثواه

هذا حبيب ولا عليّه مشاريه
...................عشره قديمه والحكي توّ معناه

ترى الوفا والطيب حق ٍموّفيه
......................ترى الغلا والحب حق موّفاه

من باعني بعته وتقصر خطاويه
................مدعي عليه ادعي عسى الله يرعاه

لا ياندي العرض هذي تواصيه
.................ابوي انا اللي وافي الهرج بوصاه

وانا الذي من يشري القلب شاريه
.......................هذا محله قلبي واسعد بلقياه

اقلّطه في صدر قلبي وهلّيه
..................ارحب هلا واهلاٍ وننحر له الشاه

ونقدّم الفنجال والهيل حاليه
...................اشقر مقره من ورى الهند مجناه

يعني انتهى المشوار لاباس ياهيه
.................خمسين بيتٍ شاعر الجن سواه

وخمسين بيتٍ تقفي اللي مسويه
..............مسرج خيول الجن واهجيك بحكاه

من قدّم الطيبه نرفّع معاليه.
..................ومن قدّم السيّه مع الدرب دسناه

ادعيك من قلبي وانا الغير مدعيه
.................مشتاق انا والشوق وشلون ابنهاه

في داخلي حربٍ من الشوق مذيه
..................والصبر طعمه مر وكيف اتحلواه

من لايعرف الحر لاشك يشويه
.............اخطيت في حقي وانا ارجيك رجواه

انا الذي منهو رقا فوق اوطيه
........................عليك ياللي كل رجمٍ تعلاه

لا تحسب اني بسهر الليل مقضيه
...................جاتك مثايل وفهم القول وقراه

قبل امس احبه وفتخر في تلاقيه
.................واليوم هذا مثلي صرّح كرهناه

الخط الاحمر ليه نفسك تعديه
.....................قد قلت الك ومحذّرك لا تعداه

رادي ومثلي لاحشى ما ترديه.
..................درب الردى لارحم منهو تمشاه

كان الغدر ميزه وتفخر بتاليه
......................الله يعينك تالي الوقت عزاه

تصبح مابين الناس محدٍ يدانيه
.................قبلك صفق يمناه في كف يسراه

الرادي اللي يمشي محدٍ يراعيه
...................هذي حياتك باخر الوقت وتلاه

ياللي تقول الحب وافي ومرخيه.
.................حبل الوفا تقصره وشلون ترخاه

الحر لامن فز يكفخ جناحيه
..................انا عزيز النفس واللي ورثناه

المرجله والطيب لازم نقديه
....................ماني شحيحٍ تايه ارداه برداه

واليوم ياوجهٍ بدا فيه وشفيه
.....................الاّ عرفت القلب هذا ومرضاه

لا يالذي قلبك من الغدر تحشيه
....................هذا وانا مهجيه وذكر حلاياه

.لكن علي الله ماعاد انا ارجيه
....................في رجعته همٍ ولا عاد نبغاه

فيه البقا واللي حلاته نعزيه
......................اقولها من بعد هذا عرفناه

يرثيه وقت الحب والحال ترثيه
....................كم واحدٍ قبلك ترانا رثيناه

هذاك غالي والله اللي متوفيه
..............ولاانت لا مثله ولا وجيت شرواه

يشهد له التاريخ حضر وبواديه
.............يرحمك ياللي وافي الطيب والجاه

ونتي بديتي بالغدر من مواريه.
...............عمر الغدر شاين ولو زان مرباه

درب العنا ياللي نويتي مساعيه.
...................خايب وظنك ضايع ابكل مسعاه

فيك الغدروافي على كل اراضيه
.................ثوب الغدر ما والله يومٍ لبسناه

بأسم من انزل محمد وحاميه
....................الواحد القهار ربٍ عبدناه

ماني على صدك ترى القلب اعنيه.
................وشعاد يعني لو مثلك هجرناه

القلب يسلا مع هل الطيب اسليه
..............عندك خبر كلٍ على كيف مشهاه

اقفت ليال الحب واقفت لياليه
..............والشوق روّح لاترجى وتنصاه

اطغيت حتى القلب بالغدر معميه
..............الصبح لك قلبٍ مع الحب يهواه

والليل لك قلبٍ من الغدر ماليه
.............كنت الامل والنفس مثلك تحراه

ماني صغير السن مثلك يخطيه
..............اخطيت ياللي كل شيٍ تخطاه

اللي رقا للخير ربي يجازيه
..............جعله بخير وراعي الطيب حياه

واللي يحب الشر منهو يخاويه
...............ياكود مثل الطبع لاشك خاواه

العقل راس المال وشلون اقديه
.............في ذكر ربٍ عالي الناس تخشاه

جفت عروق القلب جفت خباريه
...............لاتحسب ان الحر مثلي تشواه

حرٍ وفي وصفه طوالٍ مواميه
...............انا عريب الجد ياضايع اجداه

اخطيت في قلبي على الكيف مهديه
.............انا اشهد اني ظالم القلب وسقاه

اسقاه من ظيم الليالي ومسقيه
..................همٍ وكل همٍ موفّي زواياه

الصدر لا من ضاق بالقاف اواسيه.
..............شاعر وومّر كل شطرٍ كتبناه

اكتب حروف الشعر من كيفي ووفيه
..............والشعر وهبه والعفو ماشريناه

وغيري كثير الناس لشعر تنخيه
............الناس واجد ياهل العرف تنخاه

لامن كتب بيتٍ تعزوا بعزاويه
...............مسكين ياللي كل شطرٍ تبناه

وانا احمد الله كل شطرٍ موازيه
...............لاطاح شطرٍ قام خيّه توازاه

العقل وافي واحمدلله مكسيه
............بالطيب والمعروف حنا كسيناه

حاضر بحاضر ياهل الحسد اسويه
..........والموت حقٍ يحصد العمر يفناه

متين شطرٍ وافي العرف محصيه
.........ساعه وثلث الطرق حنا بدعناه

وختم قصيدي عد ماهب ذاريه
.........على النبي اللي طريقه مشيناه

والله مايسوى أعيش الدنيا دونك
لآولآتسوى حيآتي بهالوجود

ياسنين عمري كفايه حزن ياسنينــــي
لمي جروحــك وكفي الدمـع ياعينـــي
حاولت اداري الحزن الي عايش فيني
لكن حــــزن الليالي بان في عينــــــي

ان شكيت الحـــال محد لي سمووع
وان سكت الناس زادوني ملام
غربتي طالت متي وقت الرجوع
كل عام امني احلامي بعام