طاروق رائع اعجبني تجلت به الشاعريه والنقض والفتل بين الشاعر الواصل والشاعر بطاح بن وساح
اتمنى ان يحوز على رضاكم
الواصل
راق المزاج وزان بداع الطواريق = والشاعر المطنوخ يكرب حزامه
اليوم فك السبق ياهل المسابيق = دور الصقور ووقعي ياحمامه
بطاح بن وساح
لايفرح الواصل لاجا حزة الضيق = اما صبر ولاطريق السلامه
واليوم مرباع الحرار المطاليق = ورا النعيريه ليا اقصى تهامه
الواصل
ارفع نظر عينك لياقمة طويق = وتشوف بالقمه تهل الغمامه
يالعاشق الولهان غيرك عشاشيق = لاتفطر اللي ماخلص من صيامه
بطاح بن وساح
سحاب صيف ن مر مابلل الريق = وطويق للغادي دليل وعلامه
بيني وبينك يعوي الذيب ويويق = وهرج الفرح ماهو بمثل الندامه
الواصل
ياسايق الفنجال والكيف قد سيق = ماعاد تنصاك الرجال بملامه
دام الليالي يالسنافي توافيق = تلقى الكريم اللي يمد الكرامه
بطاح بن وساح
التمر يارجال للحين ماذيق = ياللي نقصت العلم هذا تمامه
من بيننا عهد وصكوك ومواثيق = لينك تشوف شعيل يطبخ سنامه
الواصل
يامحقق الشيشان تحتاج تحقيق = لانك تذم اللي عطاك العمامه
اظاهر انك ترقد بساع وتفيق = وتنزل لهامه وتجرحك هامه
بطاح بن وساح
لاصار بالموضوع ياخوك تلفيق = حتى المطوع مايصدق كلامه
عزالله انك منت مثل المخاليق = تنظر بنظره غامضه وابتسامه
حاصل على ترخيص من وزارة الثقافه والاعلام السعودي
طاروق كايف جدا
العرض العادي
