ديوان الشاعر/أحمد مسند ردين القلادي الرشيدي

ديوان الشاعر/ أحمد مسند ردين القلادي الرشيدي

صدقت ياللي قلت هالعالم اجناس
اضرب مثل يوم الطواريق زانت
ناسن تسب وناس تمدح لها ناس
شان الزمان ونيت الناس شانت
تغيرو تغيرن ماله قيـــــــاس
والكايدة في تالي الوقت هانت
الوقت هذا ماذكر فية نوماس
شفت النفوس القاسية كيف لانت
يشكي منة من يملك شعور وحساس
عانئ ونفسه من غثئ الوقت عانت
بعد الرجاء حدة زمانة علئ الياس
خانة زمانة والليالي وخانت
أفهم بها ياحر ياطير قرناس
قدام لاحكيها إليك استبانت
دنيا بها ماشي وطرقي وعساس
واروح منها ماتقل يوم كانت
اليا صفت تسقيك من غيثها كاس
واليا غدرت سود الليال استهانت
وتلبسك من ضيمها مية لباس
لون نفسك للردئ ماتدانت
تلقئ بها من هم الايام مجلاس
ياشينها كان الليال استعانت
من جورها ياصاحبي شيب الراس
توي ضغير وشيبت الراس بانت
خلتني أكتب من عناها بقرطاس
حانت علئ يوم القدر نفس حانت
صارت تحس امراض وتحس بوناس
مانت علي بجرحها حيل مانت
لين اكرهت عيني من النوم منعاس
من السهر لوعات قلبي تبانت
قامت تجيب ارماس وتبعد ارماس
ماصانت اللي بأول العمر صانت
مقباس شر وخير مافية مقباس
واستغفر الله كان بالخير عانت
ودنيا بها ماشي وطرقي وعساس
واروح منها ماتقل يوم كانت

**********
علئ شوي شوي يمشن الايام
يروح عمر الأدمي مادرالة
تسوقة القدرة ويمشن الاقدام
حتئ يجيلة يوم تقفئ رحالة
هذي هي الدنيا ولاشي به دام
ماباقي الا اللي خلقها لحالة
يالله يارب الفقراء والايتام
ياربي المعبود جلاء جلالة
إنك تعين اللي من الوقت منضام
واللي تحمل بالزمن ماجرالة
اليوم عام وقبلة أعوام وأعوام
ونا بحاله ماهي اليوم حالة
يقبل ظلام الليل ويطوف مانام
والهم في قلبي يبهر دلالة
انا وورق شعري وهمي والاقلام
كلن يعدل لليالي عقالة
الوقت قسم همة بقلبي اقسام
وعن كل هم أقفي ويلحق ظلالة
ويصدق معي با أحلام ويخون بحلام
نذالتن ياشينها من نذالة
الوقت كافر مايصلي ولاصام
ظالم ولاعمرة حكم في عدالة
هان الرجال وهان أبو عدي صدام
خلاة عقب العز يفقد عيالة
وهو قبل ليهان من روس حكام
وصار عبرة للدول بحتلالة
يوم اوتلوة اللي يعدمون اعدام
مانشدوا عن حال عمة وخالة
عدوان ملتنا وعدوان الاسلام
جعل اليهودي ماتكثر أمثالة
اللي غزونا في كوابيس وأفلام
أفلام فيها من جميع الرذالة
شين يغير واقع اليوم بوهام
ويخلي العاقل يشك بخيالة
شف قوء فرق اليوم عن ماضي العام
وإن مت سجلي وش اللي بدالة
خل الحدث مابين قوسين وأرقام
ودري عنة وإن كان محدن درالة
بنه شعار لتالي الوقت وعلام
وأن الزمن بعدي تشيب أفعالة
ودي اوصي كل طيب وضرغام
عساة مني تاصلة هالرسالة
لاصرت من ناسن عزيزين وكرام
لاتخلي دروب الشرف والرجالة
واليوم عام وقبلة اعوام واعوام
ونا بحالة ماهي اليوم حالة

صح لسان شاعرهااا


مشكور علي النقل المميز