اغليه من راسه الى حد رجليه

يا باش يا فندم يا لبيه يا بيه = يا زعتمان الغنج يا زعتمانه

يا ارجوانة قلبي الغض تليه = تليه دام انك سكنتي مكانه

يا روز يا ريحان يا ورد جوريه = يا جُلنار الروح يا اقحوانه

(نردين)( افنان) ( السفرجل) يا لبيه = يازهرة( الجمار) يا( ديدحانه)

يا احلا من الكمبود والمسك واخيه = عنبر أمخلط في وسط زعفرانه

ابي انشدك ياسيدي عقلي اش فيه = موزون قبل اجيك واليوم عانه

ملحوس من اقصاه لاقصاه لادنيه = ماكنه الا رقصة البرتقانه

تايه يابو سلطان ومن يعشق التيه = يلحس براطم شفته في السانه

ربع الخلا عديت وربعه باعديه = باللي بقى في داخلي من حنانه

اما يسريني والا باسريه = والا بخلي عشقته طربخانه

كانه يعنيني والله لاعنيه = واطوي عويده طويت الخيزرانه

طوية صميل القيض لطويه وطويه = وافتل آمغيزل هقوة الغيهبانه

واكرب آرسانه وآستفزه وارخيه = والجم قوي الراس واكرب آعنانه

وارضيه وآرجع ازعله ثم اراضيه = وارد.. وارجع وآتجاهل مكانه

وانشده عن الشوق شخبار طاريه = الا على فكره نسيته امانه

والاعبه والعب ابعقله واخليه = واسهج سؤاله وانشده عن اخوانه

والكع لكاعة حضرته ثم اربيه = واسوق شيطان اللكاعه عشانه

لكن اذا انه بكى لي وش اعطيه = سلطان والسلطان بامر البطانه

يزوم لكن البطانه اتهديه = ما يملك الا خوذته مع حصانه

ياصولجانة مُلك المُلك خوذيه = جعله فداك وفدوتك هيلمانه

امر ولك امر الملك دون تنبيه = تم ولك التنفيذ واجب ضمانه

تفرق عن الحكام في بيعتك ليه = لان بيعتك يا بيه فيها حصانه

متحصنه عن الغرض والمشاريه = ماهي من اجل فلوس ولامكانه

الشيخ يابن الشيخ من شيخة ابيه = ولا انت تحشم عن شيوخ المهانه

اللي يسوم الطيب ولاهو ابشاريه = ما غير كم و كم يلهج السانه

ياجعلهم فدوت مواطي خطاويه = هذاك يفدونه شيوخ اللعانه

اللي يحاكيني وانا قول له ايه = مدري شيقول ولكن اقول وانه

كن جرهدية منطقه يلظمه فيه = فم(ن) آمصمم كنك آتقول دانه

رمله من الرمان مرشوش شاطيه = ولا بحر شاطيه من عنفوانه

اغليه من راسه الى حد رجليه = واغلي آمخصر ثوبها مع اردانه

منقول