نسل وايل

يابو شهد طالبك خطي توديه
تكفا طلبتك يا حفيد القرومي
يا مسندي لا صار بالوقت ما فيه
انت الرجاء واسند عليك العلومي
حيثك ليا صاح المنادي تلبيه
وانا عليك اسندت حامض همومي
ياحر يانسل الاحرار ومجانيه
من ما كرن ما تنتمي له رخومي
من نسل وايل طيباتن مباديه
قومن يعرفون السنع والسلومي
قبيلتن قانونها ماتخليه
تبين لاحان الطلب واللزومي
مقدرين الجار والضيف تقريه
اهل الدلال دقيقات الخشومي
يشهد لها التاريخ والناس تحكيه
ومن لايعد الحق جاحد ظلومي
وحيثك من اللي واق بالطيب عاليه
لاما وقفت بعاليات الحزومي
من طيب ابوك وطيب جدك موصيه
وفيه احتفظت وفيه سقت القدومي
اقولها والمدح شرواك يزهيه
وابصم على قولي برووس البهومي
وفيك انتخيت وعنك مالي ولاابيه
لو حاجتي بيديه عنها بشومي
ولالي على غيرك عتاب ومشاريه
مادام لك عدن رواته تزومي
تكفا ترى تكفاء لمثلك تقزيه
وتثر عليه الياسمعها يعومي
وعندك لها تقدير وتجيب خافية
ولابه سواك اللي بوضعي يقومي
ومن يفعل المعروف ربه يجازيه
وعند العرب ذكره بطيبه يدومي
والطيب يبقى حي لو مات راعيه
يبقى مثل نقش الحجر والرسومي
ذكره يشرف صاحبه عند طاريه
يلمع مثل لمع القمر و النجومي
وده لراع الوقفة اللي عزاويه
تشملك وتخصه وفيكم عمومي
ابومحمد عز ضيفه وعانيه
زبن الفقير اللي بفقره يعومي
من حر مابه كل رجمن يعديه
من ضيقته يبرى الطويل ويهومي
وابن سعد طيبه مع الناس يكفيه
ماهو بمحتاجن لمدحي ولومي
مير انت عني لاتكلمت تنبيه
ويسمع كلامك ولك قلبه رحومي
والوضع بعد الله الياقال بيديه
وينزاح همي واتهنى بنومي
وكلن جزاه بمافعل عند واليه
الواحد اللي ساق سود الغيومي
اللي عليم بحال عبده وخافيه
كفيل رزق الخلق في كل يومي
واقبل جواب من الرشيدي معانيه
للوايلي جعله يعيش ويدومي
أن طاب هذي قهوتي في معاليه
وان مانفع هذي من الله قسومي

اهداء خاص/من الشاعر عبدالرحمن هليل الرشيدي